Transmetohet nga Abdullah Ibën Umeri, Allahu qoftë i kënaqur me të dhe babain e tij, se erdhën tek ai dy burra për ta pyetur për fitnen e Ibën -Zubejrit dhe i thanë: “Njerëzit kanë bërë këtë e këtë, kursi ti djali i Umerit, shoku i Pejgamberit, sal-lAllahu ‘alejhi ue sel-lem, çfarë të ndalon të marrësh pjesë në kryengritje?” Ai tha: “Ajo që më ndalon është se Allahu e ka ndaluar ta derdh gjakun e vëllait tim.” Ata i thanë: “A nuk thotë Allahu “...dhe luftoni ata derisa të mos ketë fitne...” (el-Enfal, 39) Ai tha: “Ne luftuam që mos të ketë fitne (kufër) dhe e gjithë feja (adhurimi) ishte vetëm për Allahun. Kurse ju dëshironi që të luftoni derisa të ketë fitne dhe të jetë feja (adhurimi) për dikë tjetër.” [Transmeton Bukhariu, 4513]