“Me të vërtetë Allahu, Ai është Furnizuesi i gjithçkaje, Ai i Cili posedon fuqinë e pathyeshme." [Edh-Dharijat, 58]
Ndërsa emri Err-Rraazik është përmendur në trajtën e shumësit në disa vende; një prej tyre është Fjala e Allahut të Lartësuar:
">﴿ وَٱللَّهُ خَيۡرُ ٱلرَّٰزِقِينَ١١﴾
“Allahu është më i miri nga të gjithë furnizuesit." [El-Xhumu'ah, 11]
Gjithashtu, ai është përmendur në Sunet, siç do të përmendet më vonë te emrat El-Kaabid dhe El-Baasit.
Pra, Allahu i Patëmeta është Furnizuesi i gjithçkaje (Err-Rrazzaak), që do të thotë se Ai e ka marrë përsipër furnizimin e robërve. Ai e mban çdo gjallesë me furnizimin e përditshëm që ajo ka nevojë. Thotë i Lartësuari:
“E sa prej gjallesave nuk kanë mundësi ta sigurojnë furnizimin e tyre, kurse Allahu i furnizon ato edhe juve." [El-Ankebut, 60]
Furnizimi i Allahut për robërit e Tij është dy llojesh:
I pari: Furnizimi i përgjithshëm, i cili përfshin të devotshmin dhe të shthururin, besimtarin dhe qafirin, të parët dhe të fundit. Ky është furnizimi fizik për ta. Thotë i Lartësuari:
“Çdo gjallesë që është në tokë, Allahu e ka garantuar furnizimin e saj." [Hud, 6]
Duke u bazuar në këtë themi se: nëse dikush ka furnizim të shumtë të këtij lloji në këtë botë, kjo nuk është argument se ai është i nderuar tek Allahu. Ashtu siç nuk është argument furnizimi i pakët i ndonjërit, se ai është i pavlerë tek Allahu.
“E sa i përket njeriut, që kur Zoti i tij e sprovon duke e nderuar dhe duke i dhënë mirësi, ai thotë: ‘Zoti im më ka nderuar!’ Ndërsa, kur e sprovon duke ia pakësuar furnizimin e tij, Ai thotë: ‘Zoti im më ka poshtëruar’!” [El-Fexhr, 15-16]
Ky ajet do të thotë se: jo çdokush që Allahu e ka begatuar në dynja është i nderuar tek Ai; e jo çdokujt që Allahu i ka dhënë pak furnizim në dunja, është i poshtëruar tek Ai. Në të vërtetë, pasuria dhe varfëria, bollëku dhe pakica, janë sprovë dhe testim nga Allahu, që të dallohet se kush është falënderues e kush është mosmirënjohës, kush është durimtar e kush është jo durimtar.
I dyti: Furnizimi i veçantë. Ky është furnizimi i zemrave dhe ushqimi i tyre me dije dhe iman dhe furnizimi hallall që e ndihmon robin që të jetë në rregull me fenë e tij. Ky furnizim është i veçantë vetëm për besimtarët, në varësi të gradave të tyre, sipas urtësisë dhe mëshirës së Tij. Pastaj, Allahu i Patëmeta do ta plotësojë bujarinë dhe mirësinë e Tij për ta, Ditën e Gjykimit, duke i futur në Xhennetet e begative. Thotë i Lartësuari:
“E kush beson në Allahun dhe vepron vepra të mira, Ai do ta fusë atë në Xhennete, nëpër të cilat rrjedhin lumenj, ku do të qëndrojnë përjetësisht. E sa furnizim të mirë që i ka dhënë Allahu atij!" [Et-Talak, 11]