Ky emër është vërtetuar në Sunetin e Profetit fisnik – sal-lAllahu ‘alejhi ue sel-lem. Ka transmetuar Imam Ahmedi dhe të tjerë përveç tij, nga Enes Ibën Malik – radijAllahu ‘anhu – se Profeti – sal-lAllahu ‘alejhi ue sel-lem – e ka dëgjuar një burrë duke thënë:
“O Allah, unë të kërkoj Ty, duke dëshmuar se me të vërtetë Ty të takon e gjithë lavdia dhe falënderimet. Nuk ka të adhuruar tjetër me të drejtë, përveç Teje. Ti je i vetmi dhe Ti s’ke ortak. Ti je Dhuruesi i çdo mirësie. Shpikësi i qiejve dhe i tokës. Merituesi i madhërimeve dhe lavdeve.”
Ndërsa Pejgamberi – sal-lAllahu ‘alejhi ue sel-lem – i tha:
لَقَدْ سَأَلْتَ اللهَ بِاسمِهِ الأعظمِ الَّذي إذا دُعي به أجاب وإذا سُئل به أعطى.
“Me të vërtetë që i ke kërkuar Allahut me emrin e Tij më të madh, të Cilit nëse i lutesh me këtë emër, Ai të përgjigjet, e nëse i kërkon diçka me të, Ai ta jep atë që i kërkove.”
Emri El-Mennaan do të thotë: Ai që jep shumë, jep dhurata të mëdha, bën shumë të mira. Ai i Cili i lëshon pa masë mirësitë mbi robërit e Tij dhe u jep pandërprerë begati nga mirësia dhe bujaria e Tij.
Nuk ka dhurues absolut, përveç Allahut të Vetëm, i Cili të dhuron, përpara se të kërkosh nga Ai! Atij i takon merita për mirësitë robërve të Tij, e asnjë tjetër nga krijesat nuk ka ndonjë meritë tek Ai. I Lartësuar është Allahu, me lartësinë më të madhe, që dikush të ketë ndonjë meritë tek Ai! Kjo është një çështje e cila dëshmohet qartazi te të gjitha krijesat, qofshin krijesa të mira apo të këqija, për mirësitë e panumërta që u ka dhuruar Ai, për dhuratat e bollshme, për mbështetjen bujare, për mëshirën e gjerë, për mirëbërjen dhe butësinë e Tij, për plotësimin e kërkesave të atyre që kanë telashe, për largimin e fatkeqësive nga ata që janë goditur me fatkeqësi, për ndihmën që u jep atyre që janë të zhytur në dëshpërim, për largimin e sprovave dhe belave pasi që të jenë përmbushur shkaqet, përpara se ato të ndodhin, si për largimin e tyre pasi që ato të kenë ndodhur, si dhe për butësinë e Allahut të Lartësuar për ata që i kanë humbur shpresat se ato mund të largohen.
Prej begative më të mëdha të Allahut të Patëmeta, është edhe udhëzimi që u jep Ai elitës dhe robërve të Tij në rrugën që të shpie në Tokën e Paqes, edhe mbrojtja e Tij për ta, në mënyrën më të mirë, edhe ruajtja e Tij për ta, që të mos bien në gjynahe, edhe fakti që Ai ua bëri atyre të dashur Imanin dhe ua zbukuroi në zemrat e tyre, edhe fakti që Ai ua bëri atyre të urryer mosbesimin, gjynahun dhe mosbindjen, edhe që i bëri ata prej të udhëzuarve... si dhe shumë e shumë mirësi dhe begati të llojeve të ndryshme. Është pikërisht Ai, Allahu i Patëmeta, i Cili ka thënë:
“Edhe po të përpiqeshit t'i numëronit mirësitë e Allahut, nuk do të arrinit dot kurrë që t'i numëronit ato." [En-Nahl, 18]
Është i Madhërishmi që ka thënë:
">﴿وَمَا بِكُم مِّن نِّعۡمَةٖ فَمِنَ ٱللَّهِۖ﴾
“E çdo mirësi e begati që ju keni, e keni nga Allahu!" [En-Nahl, 55]
Andaj, kush dëshiron që të shohë burimet e mirësive, atëherë le ta hedhë shikimin vazhdimisht në kopshtet e Kur'anit Fisnik dhe të meditojë në mirësitë e Tij të mëdha, të cilat i ka përmendur Allahu në të, si dhe në dhuratat e Tij të çmuara dhe begatitë e Tij të shumta.
Dhe kush e njeh Zotin e tij – të Pastrin nga çdo mangësi – me këtë emër madhështor dhe e di që vetëm Ai është dhënës i mirësive dhe i dhuratave, Ai që dhuron dhe begaton, atëherë kjo njohje e obligon atë që ta lavdërojë Zotin e tij për dhuratat e Tij dhe ta falënderojë Atë për mirësinë e Tij dhe për dhuratat që i ka dhënë. Thotë i Lartësuari:
“Ai (Sulejmani) tha: O Zoti im, ma mundëso mua që të jem falënderues për mirësitë e Tua, të cilat m'i dhurove mua dhe prindërve të mi." [En-Neml, 19]
O Allah, Ty të takojnë lavdet dhe falënderimet për të gjitha këto, lavde dhe falënderime të shumta, të mira e të pafundme. O Allah, Ty të takojnë lavdet dhe falënderimet, derisa Ti të jesh i Kënaqur, e prapë Ty të takojnë lavdet dhe falënderimet nëse je kënaqur.