“Allahu është Drita e qiejve dhe e tokës. Shembulli i dritës së Tij është porsi një kandil i vendosur në një qoshe të errët, e kandili është në një qelq dhe ky qelq ndriçon porsi një yll që shkëlqen, i ndezur prej vajit të pemës së bekuar të ullirit, e cila nuk është prekur vetëm prej rrezeve të perëndimit e as vetëm prej rrezeve të lindjes, ndërsa vaji i saj ndriçon edhe pa e prekur zjarri. Dritë përmbi dritë! Allahu udhëzon drejt Dritës së Tij atë që do Ai. Kështu i sjell Allahu shembujt për njerëzit. Allahu për çdo gjë është i Gjithëditur." [En-Nuur, 35]
Shejkh Abdurr-Rrahman Ibën es-Sa'dij – Allahu e mëshiroftë – e ka sqaruar kuptimin e këtij emri me disa fjalë përmbledhëse dhe ka qartësuar domethëniet e tij. Ai ka thënë: “Drita, si cilësi e Allahut të Lartësuar është dy llojëshe:
Lloji i parë: Drita e Tij konkrete. Ajo është drita madhështore me të cilën e ka përshkruar Veten e Tij. Nëse do largohej perdja nga Fytyra e Tij, rrezatimi i Fytyrës së Tij dhe drita e Madhërisë së Tij do të digjte çdo krijesë që përfshin shikimi i Tij. Kjo dritë nuk mund të përshkruhet ndryshe, vetëm se me këtë shpjegim profetik që mund të përcjellë këtë domethënie madhështore. Asnjë prej krijesave nuk i reziston dot kësaj Drite të Fytyrës së Tij, nëse Allahu do t’ua shfaqte atë dritë. Gjithashtu, sikur Zoti të mos u jepte jetë të përsosur banorëve të Xhenetit, duke i ndihmuar ata për ta shikuar Atë, ata kurrë nuk do të kishin mundur ta shikonin Zotin e Madhërishëm. Të gjitha dritat në qiejt e lartë janë prej dritës së Tij, madje edhe drita e Xheneteve të begata – gjerësia e të cilëve është sa gjerësia e qiejve dhe e tokës, madhësinë e të cilëve nuk e di askush përveç Allahut – është prej dritës së Tij. Kështu, edhe drita e Arshit, Kursijit dhe Xheneteve, është prej Dritës së Tij, po ashtu edhe drita e diellit, hënës dhe yjeve.
Lloji i dytë: Drita e Tij abstrakte. Kjo është drita me të cilën Allahu ka ndriçuar zemrat e Profetëve të Tij, robërve të Tij të sinqertë e të dashur dhe melaikeve të Tij, duke u dhënë atyre dritë për ta njohur Atë dhe për ta dashur Atë. Kjo për arsye se për ta njohur Atë, në zemrat e të afërmve të Tij besimtarë duhet të ketë dritë, e cila është në varësi të njohurive që kanë arritur ata për cilësitë e Madhështisë së Tij dhe në varësi të besimit që kanë ata për Cilësitë e Bukurisë së Tij, ngaqë çdo cilësi e Tij ka ndikim në zemrat e tyre. E me të vërtetë që njohja e Zotit është njohuria më e madhe nga të gjitha njohuritë, sikurse dituria rreth Tij është dituria më fisnike nga të gjitha dituritë. Të gjitha dituritë e dobishme janë dritë në zemra. E si është çështja me këtë dije, nëpërmjet së cilës arrihet njohja e Allahut, e cila është dituria më e mirë e më fisnike, është baza dhe themeli i të gjitha diturive?!”
Atëherë, përderisa Drita është prej emrave të Tij dhe cilësive të Tij, atëherë feja e Tij është dritë, i Dërguari i Tij është dritë, Fjala e Tij është dritë dhe Toka ku Ai do t’i nderojë robërit e Tij është dritë që vezullon. Ajo është drita që shndrit në zemrat e robërve të Tij besimtarë, që del nga gjuhët e tyre dhe shfaqet në fytyrat e tyre. Allahu i Madhëruar e i Lartësuar do t’ua plotësojë atyre këtë dritë në Ditën e Ringjalljes, siç thotë Allahu i Patëmeta:
“Drita e tyre do të ndriçojë para tyre dhe nga e djathta e tyre, e ata do të thonë: ‘O Zoti ynë, na e plotëso dritën tonë dhe na fal neve! Me të vërtetë që Ti je i Plotfuqishëm për çdo gjë.’" [Et-Tahrim, 8]