“Ai është Allahu, është Ai, përveç të Cilit nuk ka të adhuruar tjetër me të drejtë. Ai është Mbreti, i Pastri nga çdo mangësi, i Përsosuri që nuk i ngjitet asnjë e metë, Dhënësi i sigurisë, Dëshmuesi, i Plotfuqishmi, i Lartmadhërishmi, Krenari. I pastër është Allahu nga ato gjëra që ia shoqërojnë ata!" [El-Hashr, 23]
Emri El-Xhebbaar ka tre kuptime:
I pari: është me kuptimin e Nënshtruesit (El-Kahhaar), ngaqë Allahu i Patëmeta është Nënshtruesi i gjithçkaje dhe Atij i është nënshtruar çdo gjë. Bota qiellore dhe bota tokësore, me të gjitha krijesat e mëdha që kanë këto dyja, të gjitha janë nënshtruar në lëvizjet dhe qëndrimet e tyre. Çdo gjë vjen dhe shkon te Mbreti dhe Sistemuesi i saj. Pra, asnjë krijesë nuk ka në dorë asnjë çështje dhe nuk posedon asnjë gjykim, përkundrazi, çdo çështje i takon Allahut. Gjykimi sheriatik, gjykimi me kader dhe gjykimi shpërblyes, të gjitha këto i takojnë vetëm Atij. Nuk ka Gjykues tjetër, përveç Atij, nuk ka Zot tjetër, përveç Atij dhe s'ka të adhuruar tjetër me të drejtë, përveç Atij.
I dyti: ka kuptimin e butësisë së mëshirës dhe dhembshurisë, ngaqë është Ai i Cili e qetëson atë që është i pikëlluar, e pasuron të varfrin, i jep lehtësim atij që është në vështirësi, e qetëson atë që është i sëmurë dhe i plagosur, duke i bërë të mundur që të bëjë durim, ia lehtëson shëndetin dhe e kompenson me shpërblimin më të madh për sprovën që përjetoi. Ndërsa, në mënyrë të veçantë, Ai i qetëson zemrat e atyre që i përgjërohen Atij dhe i nënshtrohen Madhështisë dhe Lartmadhërisë së Tij. Ai i qetëson zemrat e atyre që e duan Atë dhe i nënshtrohen Përsosmërisë së Tij. Ai i qetëson zemrat e atyre që shpresojnë mirësitë dhe dhuratat e Tij, ngaqë është Ai që derdh në zemrat e tyre dashurinë, dituritë e ndryshme, suksesin hyjnor, udhëzimin dhe drejtimin. Kështu që, thënia e lutësit:
اللَّهُمَّ اجْبُرْنِي
Allahumme exhburnii
“O Allah, më nënshtro mua!”
Ka për qëllim këtë lloj nënshtrimi, realiteti i të cilit është përmirësimi i njeriut dhe largimi i çdo fatkeqësie dhe të keqeje nga ai. I Dërguari i Allahut – sal-lAllahu ‘alejhi ue sel-lem – thoshte në uljen mes dy sexhdeve:
“O Allah! Më fal mua, më mëshiro, më nënshtro, më udhëzo dhe më furnizo!"
I treti: prej kuptimeve të emrit El-Xhebbaar është: I Larti mbi çdo gjë, Ai i Cili posedon të gjitha kuptimet e Lartësimit: lartësimin me Veten e Tij, lartësimin me Fuqinë e Tij dhe lartësimin me Pushtetin e Tij.
E gjithë lartësia i takon Allahut, të Vetëm. Ndërsa, kush prej krijesave tregohet arrogant, ai ka fituar Zemërimin e Allahut dhe ka merituar dënimin e Tij. E me të vërtetë që, Allahu i Madhëruar e i Lartësuar e ka kërcënuar njeriun e tillë me ndëshkimin e rëndë, me vulosjen e zemrës dhe me futjen në Zjarrin e Xhehenemit në Ditën e Gjykimit. Allahu i Lartësuar thotë:
”Ditën e Gjykimit, do të dalë një qafë nga Zjarri i Xhehenemit, e cila do të ketë dy sy që shikojnë, dy veshë që dëgjojnë dhe një gjuhë me të cilën do të flasë, e kështu do të thotë: “Unë jam urdhëruar që të fus në Zjarr tre lloj njerëzish: Çdo arrogant inatçor, çdokënd që ka adhuruar të tjerë, përveç Allahut, si dhe ata që kanë bërë figura të krijesave me shpirt.”