“Ai është Allahu, përveç të Cilit nuk ka të adhuruar tjetër me të drejtë. Ai është Mbreti, i Pastri nga çdo mangësi, i Përsosuri që nuk i ngjitet asnjë e metë, Dhënësi i sigurisë, Dëshmuesi, i Plotfuqishmi, i Lartmadhërishmi, Krenari. I Pastër është Allahu nga ato gjëra që ia shoqërojnë ata!" [El-Hashr, 23]
Kuptimi i këtij emri fisnik është: Ai që është i Pastër nga të gjitha të metat dhe mangësitë, ngaqë Ai është i Përsosur në Veten e Tij, cilësitë e Tij dhe veprat e Tij.
Pra, Ai, i Madhërishmi dhe i Lartësuari, është i Përsosuri i Vërtetë në çdo aspekt.
Ai është i Përsosur në Cilësitë e Tij, nga çdo e metë dhe mangësi që mund të arrijë imagjinata.
Ai është i Përsosur në Veprat e Tij, nga çdo e metë, mangësi, sherr, padrejtësi dhe nga çdo vepër që bëhet pa urtësi.
Ai, i Pastri nga çdo e metë, është i Përsosur nga pasja e ndonjë bashkëshorteje dhe fëmije.
Ai është i Pastër nga ajo që dikush të jetë i ngjashëm, i barabartë, i njëllojtë dhe i njëjtë me Të.
Ai është i Pastër nga pasja e ndonjë shoku dhe ortaku.
Gjithashtu, ky emër i përmban të gjitha cilësitë e Allahut të Lartësuar, sepse çdo cilësi nga cilësitë e Tij – të Madhëruarit e të Lartësuarit – është e pastër nga çdo e metë dhe mangësi. Këtë çështje e ka sqaruar hollësisht dhe e ka vërtetuar Ibën Kajjimi – Allahu i Lartësuar e mëshiroftë – duke e shtjelluar atë me fjalë të qarta dhe të forta, pastaj e përmbylli me fjalën e tij: “Andaj, medito se si emri i Tij Es-Selaam përmban çdo gjë të pastër e të përsosur që i takon Atij – të Madhëruarit dhe të Lartësuarit. Sa e sa njerëz e kanë memorizuar këtë emër, mirëpo nuk e dinë se çfarë sekretesh dhe kuptimesh përmban ky emër”.