“Ne edhe më përpara i jemi lutur Atij, se me të vërtetë që Ai është Bamirës dhe Mëshirues i Madh." [Et-Tuur, 28]
Kuptimi i këtij emri është: Ai i Cili ka përfshirë të gjitha krijesat me mirësinë, begatinë dhe dhuntinë e Tij, ngaqë Ai i ka në dorë begatitë, Ai jep pa hesap, gjithmonë bën mirë, përherë ka qenë dhe është i cilësuar me bamirësinë dhe dhurimin e mirësive, i njohur për dhënien e begative dhe mirësive, i nderon robërit duke u dhënë e dhuruar mirësi të shumta, begati të ndryshme. Nuk ka masë që mund të përkufizojë bujarinë, bamirësinë dhe fisnikërinë e Tij sepse Ai ka bujari të madhe, dhuron vazhdimisht dhe jep me bollëk.
Gjithashtu, duhet ditur këtu se Bamirësi më i Madh i do njerëzit që bëjnë bamirësi dhe i afron zemrat e tyre tek Ai, në varësi të bamirësisë që bëjnë ata. Ai i do veprat e bamirësisë dhe shpërblen për to duke dhënë udhëzimin, lumturinë dhe lartësimin, në dynja e në ahiret.
Bamirësia në origjinë është: bërja e sa më shumë veprave të bamirësisë. Ajeti më përmbledhës për cilësitë e bamirësisë është Fjala Allahut të Lartësuar:
“Nuk është bamirësia që ju të ktheni fytyrat tuaja në drejtim të Lindjes apo Perëndimit, porse bamirësia është e atij që beson Allahun, ditën e Kijametit, melaiket, Librat e Shenjtë dhe Profetët, që jep pasurinë – edhe pse e do atë! – për të afërmit, për jetimët, për nevojtarët, për udhëtarët që nuk vazhdojnë dot rrugën, për lypësit nevojtarë, për të çliruar ata të cilëve iu është mohuar liria, që e fal namazin, e jep zekatin; ata që e përmbushin marrëveshjen që kanë nënshkruar, ata që durojnë në varfëri dhe vështirësi dhe kur luftojnë me armiqtë; pikërisht ata janë të sinqertët (në imanin e tyre) dhe pikërisht ata janë të devotshmit." [El-Bekarah, 177]
“Nuk keni për ta arritur gradën e bamirësisë, derisa të jepni nga ajo (pasuri) që ju e doni për vete. Nuk jepni ju ndonjë gjë, e të mos jetë Allahu i Gjithëditur për atë (që jepni)." [Aal Imran, 92]
Ka thënë Katadeh – Allahu e mëshiroftë: “Nuk keni për ta arritur bamirësinë e Zotit tuaj derisa të jepni nga ato pasuri që ju pëlqejnë juve dhe ua do epshi.”
Allahu na frymëzoftë të gjithëve me udhëzimin e shpirtrave tanë, na furnizoftë pa masë me fisnikërinë, mirësinë dhe bujarinë e Tij, se me të vërtetë që Ai dëgjon dhe përgjigjet.