Fusnota

[86] Transmeton Ebu Hurejrah, radijAllahu anhu, se i Dërguari i Allahut, sal-lAllahu ‘alejhi ue sel-lem, ka thënë: “Kush thotë pas çdo namazi tridhjetë e tre herë ‘subhanAllah,’ tridhjetë e tre herë ‘elhamdulil-lah’ dhe tridhjetë e tre herë ‘Allahu Ekber,’ të cilët bëjnë gjithsej nëntëdhjetë e nëntë, pastaj e plotëson me të njëqindtën duke thënë ‘Nuk ka të adhuruar tjetër me të drejtë përveç Allahut, të Vetmit që nuk ka asnjë ortak. Atij i takojnë sundimi dhe lavdia dhe Ai është i Plotfuqishëm për çdo gjë”, do t'i falen gjunahet edhe nëse janë sa shkuma e detit.’” [Transmeton Muslimi, 597]

Transmeton Ebu Hurejrah, radijAllahu anhu, i cili thotë: “Erdhën te Pejgamberi, sal-lAllahu ‘alejhi ue sel-lem, disa të varfër dhe i thanë: ‘Të pasurit na e kanë kaluar (me vepra të mira) duke arritur grada të larta dhe begati të përhershme (në Xhenet)! Ata falen ashtu siç falemi ne, agjërojnë siç edhe ne agjërojmë, por ata kanë pasuri për të shkuar në Haxh dhe Umre, bëjnë xhihad dhe japin sadaka.’ I Dërguari i Allahut, sal-lAllahu ‘alejhi ue sel-lem, i tha: ‘A t’ju tregoj për një vepër që nëse e bëni, do t’i arrini ata që ju kanë tejkaluar me vepra të mira, dhe nuk do të mund t’ju arrijë juve asnjë prej atyre që do vijnë pas jush dhe do të jeni më të mirët në mesin e tyre, përveç atyre që do të veprojnë të njëjtën gjë?! (Ajo është) të thoni pas çdo namazi tridhjetë e tre herë SubhanAllah, tridhjetë e tre herë Elhamdulil-Lah, dhe tridhjetë e tre herë Allahu Ekber.” [Transmetojnë Bukhariu, 843 dhe Muslimi 595]