Fusnota

[39] Transmeton `Ukbeh Ibën `Amir, radijAllahu anhu, i cili thotë: “Ne i ruanim devetë e njëri-tjetrit me radhë. Kështu erdhi radha ime që të ruaja devetë. Kur po i ktheja devetë në vathën e tyre në mbrëmje, e takova të Dërguarin e Allahut, sal-lAllahu ‘alejhi ue sel-lem, në këmbë duke iu folur njerëzve, dhe i dëgjova këto fjalë prej tij: “Çdo Musliman që merr abdes ashtu siç duhet (sipas Sunetit), pastaj fal dy rekate duke u përqendruar me zemër dhe me trup, do t’i jepet Xhenneti!” Ndërsa unë thashë: Sa gjë e mirë është kjo! Ndërkohë që njeri prej të pranishmëve që kishte ardhur më përpara, tha: ‘Ajo që tha Pejgamberi, sal-lAllahu ‘alejhi ue sel-lem, pak më parë ishte akoma më e mirë!’ Vura re se ai që foli ishte Umeri, radijAllahu anhu, dhe ai tha: ‘Unë të pashë kur erdhe pak më parë, dhe Pejgamberi, sal-lAllahu ‘alejhi ue sel-lem, tha: ‘Çdonjëri prej jush që merr abdes ashtu siç duhet dhe më pas thotë: “Dëshmoj se nuk ka të adhuruar tjetër me të drejtë përveç Allahut dhe se Muhamedi është rob i Allahut dhe i Dërguari i Tij”, do t’i hapen atij të tetë dyert e Xhennetit, që të hyjë nga cila të dëshirojë ai.” [Transmeton Muslimi, 234]